Mulai ubeuet gata geusayang
Gata geutimang geu ayon doda
Geujoek sikula peurunoe sembahyang
Geubimbing amalan akherat doenya
Poma yang sulueng bu di dalam pingan
Eungkot meusantan taguen keu gata
Geurela nyamok ikap bak badan
Aneuk geusayang rayeuk bahgia
Oh rayeuk sinyak hudep ka seunang
Hudep ka mapan kana keurija
Beuna ta ingat yang seumanoe badan
Wate hai sayang gata balita
Yang sulueng ruti peuturi timphan
Yang bi peng jajan tajak sikula
Geubantu peu aphai doa seumbahyang
Geubloe pakaian ngon cindoi jakarta
Silop lagak ngon bajee tari
Sipatu tinggi ngon rok alibaba
Geubloe haleukoem payoeng ngon gari
Mandum geusudi demi aneuknda
Ngon reudoeh reudah geumeuhudep hudep
Keu boh salak phet hawa geu saba
Hana geu ingat keu ija kroeng lagak
Hana geu galak keu kebayak di jawa
Si geupai breuh geusom u sandeng
Oh santeng ganceng aneuk han keucewa
Keulumbu beukah geucop keu tabeng
Itangen geu weng intat bak sikula
Geupeurunoe adab adat ngon hukom
Peurangui yang santon keu aneuk dara ma
Cara ikat oek, cara mat gayoeng
Cara seumaboen bajee ngon ija
Cara taguen bu oh kana tuan
Cara meuhidang oh na acara
Cara tet kuweh wate lebaran
Cara meu ayang sabe adoe A
Poma meutuah jasa tauladan
Meuseubab gobnyan tanyoe sijahtra
Ka taek moto ngon rumoh manyang
Kana jabatan keudee meubanja
Kursi meuhai jeut rata ruang
Cupe ngon cawan jeut rata meja
Aneuk ka hayeu kajeut keu hartawan
Hudep ka seunang ngon lakoe kaya
Hana soe boeh yum dum gaseh sayang
Poma meukorban rayeuk that jasa
Tapi meu ubah mandum keuadaan
Wate pajan poma ka tuha
Poma jak bak aneuk kana batasan
Hana pah I pandang poma soek ija
ija geu soek meugeutah geuratan
Bajee di badan beuneung meuteuba
Oh geunak meu-en ngon aneuk cucoe
I tham le lakoe bek sapat ngon poma
Bathen teuklik poma geujakwoe
Hana I pakoe han i peumulia
Woe u gampong lam palong jambo
Poma teutahee tijoeh ie mata
Saket lam hate, singke lam jantong
Tuhan geumeuhoi meulinggai poma
Di poma jinoe katinggai sidroe
Ka beda nanggroe Tuhan kuasa
Hana soe bantu hana soe sayang
Hana soe sumbang meusikrek doa
Trep bak trep tanyoe le lalo
Keu kubu madroe lupa le gata
Terakhir tawoe bak malam nujoeh
Bek hana meuoh ngon ureueng lingka
Bak lawah jameun yoh taseumiyup
Jinoe ka tirut cabeung ka mala
Tanoh ka sare jitimoh naleueng
Bate ka keng-keueng meutuka banja
Poma preh preh doa bak sidroe aneuk
Poma meuseuk seuk soe kira hana
Sayang ta ilah rubah meusireuk
Jinoe di aneuk le that agenda
Aneuk mak jinoe le kesibukan
Jadwal arisan ngon seminar wanita
Siboek pemilu, baca buku ngon lop koran
Doa seumayang kon lage ma aja
oh tajak bak kubu jalan ka sisat
Hana leumah jrat padok ngon asan raya
Tajak bak kubu jeut sithoen sigoe
Blang ata ma meugoe sabe tapareksa
Seumen keu makam han tajeut pageue
Menyoe lampoh U hanjeut gob cuca
Keu kubu poma jeut ngon duroe buloeh
Meunyoe tanoh lampoh pageue ngon dama
Jalan u kubu tinggai sitapak
Hana rot tajak uteuen meubanja
Poma takeubah sidroe meubuju
Meutanda kubu tateupat le hana
Karangan :
Hery Tanjong
Direktur Eksekutif LABANG BANGSA
